آلله قوناقلیقی
گلدی آلله آیی مهمانلیقا دعوتدی هامی
باب رحمتدی آچوب جنته دعوتدی هامی
میزبان خالق یکتادی گلن هر قوناقا
عشقیله امتحان آلماقلیقا دعوتدی هامی
جشن تقوادی گوزل بنده لرین بایرامیدی
وارلی یوخسول بوگوزل سفرییه دعوتدی هامی
دعوت اُولموش قوناقین حُرمتی والا سایلار
دم غنیمتدی بشر گور هارا دعوتدی هامی
وئر نشان سنده بو مهمانلیقا شایسته لیقون
آتش فقری مهار ائتمگه دعوتدی هامی
فقریدن پارچالانان قلبیلره مرحم اولاق
شور و حالیله مددکاری یه دعوتدی هامی
صادق اُول حُسن صداقتله فقیرانه یتیش
مالک یوم جزا اَمرینه دعوتدی هامی
ای گرفتاریلرین دردینی ئوز دردی بیلن
غم توزی گوزیاشینی سیلمگه دعوتدی هامی
شب اِحیا شَهِ اعلایه دیوب ضربت کین
قالدی بی کس فقرا یاریه دعوتدی هامی
چاتدی مقصوده نماز اوسته علی لیله قدر
وصل یار عشقیدی دیلدن دیله دعوتدی هامی
همدل وهمزبان اولماقدی ساغالداریارانی
بو عدالت یولی دی وحدته دعوتدی هامی
بو کرامت آیینین هدیه سی قرآندی بیزه
نور رحمتدی یاغور بیزلره دعوتدی هامی
یانوسان فقر اُوتونا بتن تولدن ئوزون
صبریدی چاره سی احمد بونا دعوتدی هامی
علی و احمد زهرا حسنین عشقینه گز
پوزما ایمانووی دُوز جنته دعوتدی هامی
احمد باقری