معلم

معلم
عشق عالمینین عشقینه برهان دی معلم

دنیا بویی ئوز عشقینه قربان دی معلم

آی اولدوزولا گون ده خجالتدی بو آددان

شمع تک اریین عاشق گریان دی معلم

ظلمتله قرانلیق بئله نوری باتیرانماز

آلله بئینن ناجی انسان دی معلم

بیر عمر محبتله یانان عشق اوتیندا

بخشنده دی چون سرور خوبان دی معلم

ئوز وار یوخینی کفه اخلاصینه دوتمیش

گول چهره سی آئینه ایمان دی معلم

دان اولدوزی تک پارلیاجاق عشقینه خاطر

عشق اهلی بیلور فجره غزلخوان دی معلم

رحمان و رحیم آللاهین عشقی اورینده

لذت آپاریر عاشق رحمان دی معلم

دریای وفا و ادب و معدن غیرت

امواج سخا عشقیده طوفان دی معلم

مشکل یارادانماز بسوادلیق بو زماندا

فخر ایلییروق دیللره سلطان دی معلم

دشمنلریمیز جنگ روانی سالیر هر آن

داغ تک دایانان عاشق ایران دی معلم

پیمان ویریب آللاهینه سیندیرماز ئوز عهدین

عهد اوسته دوران حافظ پیمان دی معلم

ئوز جانینی قربان ویرر ئوز عهدینین اوسته

ایثار شهامت لره عنوان دی معلم

ارواح شهیدلر بیز اوچون شمع هدادی

سرلوحه ده یاز روح شهیدان دی معلم

عِلمین اَلمی وار یِری تا عرشه اوجالسین

پارلاق گونه تای گون کیمی تابان دی معلم
احمدباقری

آنا یوردوم شربیان...