بیر قهرمان عاشق دی بو (عشق می آید) سردار شهید محسن حججی

بیر قهرمان عاشقدی بو

عشقی معنا اِیلیین بیر قهرمان عاشق دی بو

دینینه قرآنینه قربان اولان عاشق دی بو

امتحاندان باش اوجا چیخدی ذبیح الله عشق

اکبر لیلایه بنذر بیر جوان عاشق دی بو

اللری باغلیدی قربانگاهه گئتدی عشقیله

هر باخیشدا دشمنه وحشت سالان عاشق دی بو

سسلیوب لبیک حسین دین دشمنین خوار ایلیوب

سرفراز و سربلند و جاودان عاشق دی بو

زینبه عباس اولوب اولدی علمدار حسین

عشقی سرگردان قویان عشقه نشان عاشق دی بو

عشقینه عالم فدا اولسون حسین تک جان ویریب

منتظردی اهل عشق بیر غسلی قان عاشق دی بو

دوغرانیب اعضاسی عاشورا غمی تکرار اولوب

پیکری گونلر قاباقینده قالان عاشق دی بو

عهدینی باشه یئتیردی بو ولایت عاشقی

سینمیوب سینماز بوپیمانلار اینان عاشق دی بو

عاشق اولسا شمع عشقینده یانار پروانه تک

وصل یار عشقینده گویلرده اوچان عاشق دی بو

باش ویریب باش ساخلیا اسلام و قرآن امتی

عشقه باخ ایثاره باخ فخرزمان عاشق دی بو

گل یوبانما هارداسان یا مهدی صاحب زمان

جدیوه قربان کسیلمیش خسته جان عاشق دی بو

زاهدا عشقین فقط معناسین عشق اهلی بیلر

پَر چالان پروانه تک اوتدا یانان عاشق دی بو

احمد باقری