آخرین مطالب
امکانات وب
تقدیم به روح آتنا
عمریم گولی سولدی
گون رنگی دوتولمیشدی سحر وقتی چیخاندا
اسدی قره یئل نازلی قیزیم تللرینه شانه ویراندا
قلبیم دوتولیب غملره قلبیمیده یر آشدی
ایستیردیم ئوپم تللرینه شانه دولاشدی
لال اولسا دلیم وار یری بو سوز اثرینده
بیلدیم کی بو گون واردی بلا دور و برینده
منله یولا دوشدی گوزلیم گوزلری یاشلی
غفلت ائلدیم هاردا هاچان من باشی داشلی
کرکس کیمی گویا او قوشی چنگه سالیبدی
شیطانی هوسدن سورا تز جانین آلیبدی
بو نازلی بالام غصه نی گورجک آلیشاردی
شیرین دیلیدی مهر وفادن دانیشاردی
بولبول لره تای صحبت ائدردی چالیشاردی
کوسمزدی ولی کوسه ده فورا باریشاردی
عمری آز اولوب گول بالامین ظلمیله سولدی
چوخ ایستملیدی بیلرم کی نظر اولدی
سینسین فلکین چرخی سنی آتدی گوزیندن
نفسین اوتینا ساتدی سنی چیخدی ئوزیندن
عالم سنون احوالیوه ای وای دئیوب آغلار
آغوشه آلار قبریوی یر گُوی سینه داغلار
چالدون ال ایاق ظلمیله سن قانیوه باتدون
سن سیزلمیشم سویله کی من سیز نجه یاتدون
قلبیم آلیشیب اوت کیمی چارم کسیلبدی
چوخ غملیدی بو غم بالا قددیم اگیلیبدی
بیلمم نیه تز باد خزان عمروه اسدی
ایسته قوتاریم عمریمی بو غم منه بسدی
لایلای دئیورم یات بالا گوز آچما دوباره
نفرین ائلمه سن بالا بو غملی دیاره
قورخوم بودی کی بیرده مغان چایلاری داشسین
بسدی بو غمون ایستمیرم آیری غم آچسین
داشدی او زمان آرپا چایی غیرت اوجالدی
افسوس بو محنت بیزی چوخ غملره سالدی
عمریم گولی سولدی نجه گور دوندی خزانه
آلدی سنی مندن بالا دینجلدی زمانه
لایلای چالارام آتنا جان رام اولا قلبیم
هجرون منی دیوانه ائدیب قالمادی صبریم
احمد باقری
آنا یوردوم شربیان...
ما را در سایت آنا یوردوم شربیان دنبال میکنید
برچسب: نویسنده: بازدید: 142