سوندی دریا عطشی دیللر الولاندی یاغیش

*سوندی دریا عطشی دیللر الولاندی یاغیش*

گوی قرالدی بولوتا دولدی دونیب اولدی یاغیش

یاغا نم نم قوریان یرلره احساندی یاغیش

یئل دولاندیردی بولوتلاری چالیب بیر بیرینه

اَل دعایه گوتیمیشدوق کی یره جاندی یاغیش

چوخ قرالمیشدی بولوتلار اورگی غملی گزیب

سیر ائدیر گویلری بیلمیر هارا مهماندی یاغیش

نیّتی خیریدی ایستور عطش اهلین دویورا

گوردی دریا قوریدی حالینه چوخ یاندی یاغیش

یول سالیب غملی دیاره اونی غمدن قوتارا

یتیشیب مقصده غمدن گوزی ایسلاندی یاغیش

گوز ائوی دولدی او احواله توکیب یاش اله دی

ائلدیرملار خبرین ویردی کی طوفاندی یاغیش

یاغدی یاغدی سو آخیب داغ دره دن ، دوندی سئله

سوینن دل دوداقا باخ داخی گریاندی یاغیش

سئل چوخالدیقجا یاغیش یئل دولی طوفانه دونیب

قورخوشیب آغلادی گوزلر اورگ القاندی یاغیش

کیم بیلوردی یاغیشین نیّتی نین خیر و شرین

بیزلره سر نهان رحمت و برهاندی یاغیش

قویدی آغلار نچه گوزلر نچه ائللر مله دی

سوندی دریا عطشی دیللر الولاندی یاغیش

یاغمادون یاندی قطاریله پلاسکو اورگی

دوندی خاکستره بیل حاکم دوراندی یاغیش

یاغدون اما ائله بیرکی سنیده غم بوریب

منده غم یورقونیام سوزلریم حزیاندی یاغیش

زاهدا سن نه بیلورسن بو ایشین حکمتینی

ئوزی داوردی بیلور حکمت یزداندی یاغیش

احمد باقری

آنا یوردوم شربیان...